శ్రీ వేంకటేశ సుప్రభాతం
Sri Venkatesha Suprabhatam
సుప్రభాతం ప్రపత్తి మంగలాశాసనం స్తోత్రం సహితం .. శ్రీః ..
అథ శ్రీ వేంకటేశ సుప్రభాతం
కౌసల్యా సుప్రజా రామ పూర్వా సంధ్యా ప్రవర్తతే .
ఉత్తిష్ఠ నరశార్దూల కర్తవ్యం దైవమాహ్నికం .. 1
ఉత్తిష్ఠోత్తిష్ఠ గోవింద ఉత్తిష్ఠ గరుడధ్వజ .
ఉత్తిష్ఠ కమలాకాంత త్రైలోక్యం మంగలం కురు .. 2
మాతస్సమస్తజగతాం మధుకైటభారేః
వక్షోవిహారిణి మనోహరదివ్యమూర్తే .
శ్రీస్వామిని శ్రితజన ప్రియదానశీలే
శ్రీవేంకటేశదయితే తవ సుప్రభాతం .. 3
తవ సుప్రభాతమరవిందలోచనే
భవతు ప్రసన్నముఖచంద్రమండలే .
విధిశంకరేంద్రవనితాభిరర్చితే
వృషశైలనాథదయితే దయానిధే .. 4
అత్ర్యాది సప్తఋషయస్సముపాస్య సంధ్యాం
ఆకాశసింధుకమలాని మనోహరాణి .
ఆదాయ పాదయుగమర్చయితుం ప్రపన్నాః
శేషాద్రిశేఖరవిభో తవ సుప్రభాతం .. 5
పంచాననాబ్జభవషణ్ముఖవాసవాద్యాః
త్రైవిక్రమాదిచరితం విబుధాః స్తువంతి .
భాషాపతిః పఠతి వాసరశుద్ధిమారాత్
శేషాద్రిశేఖరవిభో తవ సుప్రభాతం .. 6
ఈషత్ప్రఫుల్లసరసీరుహనారికేల-
పూగద్రుమాది సుమనోహరపాలికానాం .
ఆవాతి మందమనిలస్సహ దివ్యగంధైః
శేషాద్రిశేఖరవిభో తవ సుప్రభాతం .. 7
ఉన్మీల్య నేత్రయుగముత్తమపంజరస్థాః
పాత్రావశిష్టకదలీఫలపాయసాని .
భుక్త్వా సలీలమథ కేలిశుకాః పఠంతి
శేషాద్రిశేఖరవిభో తవ సుప్రభాతం .. 8
తంత్రీప్రహర్షమధురస్వనయా విపంచ్యా (తంత్రీప్రకర్ష)
గాయత్యనంతచరితం తవ నారదోఽపి .
భాషాసమగ్రమసకృత్కరచారరమ్యం
శేషాద్రిశేఖరవిభో తవ సుప్రభాతం .. 9
భృంగావలీ చ మకరందరసానువిద్ధ-
ఝంకారగీతనినదైః సహ సేవనాయ .
నిర్యాత్యుపాంతసరసీకమలోదరేభ్యః
శేషాద్రిశేఖరవిభో తవ సుప్రభాతం .. 10
Read More Venkateshwara Dwadasa Nama Stotram
యోషాగణేన వరదధ్ని విమథ్యమానే
ఘోషాలయేషు దధిమంథనతీవ్రఘోషాః .
రోషాత్కలిం విదధతే కకుభశ్చ కుంభాః
శేషాద్రిశేఖరవిభో తవ సుప్రభాతం .. 11
పద్మేశమిత్రశతపత్రగతాలివర్గాః
హర్తుం శ్రియం కువలయస్య నిజాంగలక్ష్మ్యా .
భేరీనినాదమివ బిభ్రతి తీవ్రనాదం
శేషాద్రిశేఖరవిభో తవ సుప్రభాతం .. 12
శ్రీమన్నభీష్టవరదాఖిలలోకబంధో
శ్రీశ్రీనివాస జగదేకదయైకసింధో .
శ్రీదేవతాగృహభుజాంతర దివ్యమూర్తే
శ్రీవేంకటాచలపతే తవ సుప్రభాతం .. 13
శ్రీస్వామిపుష్కరిణికాఽఽప్లవనిర్మలాంగాః
శ్రేయోఽర్థినో హరవిరించిసనందనాద్యాః .
ద్వారే వసంతి వరవేత్రహతోత్తమాంగాః
శ్రీవేంకటాచలపతే తవ సుప్రభాతం .. 14
శ్రీశేషశైలగరుడాచలవేంకటాద్రి
నారాయణాద్రివృషభాద్రివృషాద్రిముఖ్యాం .
ఆఖ్యాం త్వదీయవసతేరనిశం వదంతి
శ్రీవేంకటాచలపతే తవ సుప్రభాతం .. 15
సేవాపరాః శివసురేశకృశానుధర్మ-
రక్షోఽమ్బునాథపవమానధనాధినాథాః .
బద్ధాంజలిప్రవిలసన్నిజశీర్షదేశాః
శ్రీవేంకటాచలపతే తవ సుప్రభాతం .. 16
ధాటీషు తే విహగరాజమృగాధిరాజ-
నాగాధిరాజగజరాజహయాధిరాజాః .
స్వస్వాధికారమహిమాధికమర్థయంతే
శ్రీవేంకటాచలపతే తవ సుప్రభాతం .. 17
సూర్యేందుభౌమబుధవాక్పతికావ్యసౌరి-
స్వర్భానుకేతుదివిషత్పరిషత్ప్రధానాః .
త్వద్దాసదాసచరమావధిదాసదాసాః
శ్రీవేంకటాచలపతే తవ సుప్రభాతం .. 18
త్వత్పాదధూలిభరితస్ఫురితోత్తమాంగాః
స్వర్గాపవర్గనిరపేక్షనిజాంతరంగాః .
కల్పాగమాకలనయాఽఽకులతాం లభంతే
శ్రీవేంకటాచలపతే తవ సుప్రభాతం .. 19
త్వద్గోపురాగ్రశిఖరాణి నిరీక్షమాణాః
స్వర్గాపవర్గపదవీం పరమాం శ్రయంతః .
మర్త్యా మనుష్యభువనే మతిమాశ్రయంతే
శ్రీవేంకటాచలపతే తవ సుప్రభాతం .. 20
శ్రీభూమినాయక దయాదిగుణామృతాబ్ధే
దేవాధిదేవ జగదేకశరణ్యమూర్తే .
శ్రీమన్ననంతగరుడాదిభిరర్చితాంఘ్రే
శ్రీవేంకటాచలపతే తవ సుప్రభాతం .. 21
శ్రీపద్మనాభ పురుషోత్తమ వాసుదేవ
వైకుంఠ మాధవ జనార్దన చక్రపాణే .
శ్రీవత్సచిహ్న శరణాగతపారిజాత
శ్రీవేంకటాచలపతే తవ సుప్రభాతం .. 22
కందర్పదర్పహరసుందరదివ్యమూర్తే
కాంతాకుచాంబురుహకుడ్మలలోలదృష్టే .
కల్యాణనిర్మలగుణాకరదివ్యకీర్తే
శ్రీవేంకటాచలపతే తవ సుప్రభాతం .. 23
మీనాకృతే కమఠకోలనృసింహవర్ణిన్
స్వామిన్ పరశ్వధతపోధన రామచంద్ర .
శేషాంశరామ యదునందన కల్కిరూప
శ్రీవేంకటాచలపతే తవ సుప్రభాతం .. 24
ఏలాలవంగఘనసారసుగంధితీర్థం
దివ్యం వియత్సరితి హేమఘటేషు పూర్ణం .
ధృత్వాఽఽద్య వైదికశిఖామణయః ప్రహృష్టాః
తిష్ఠంతి వేంకటపతే తవ సుప్రభాతం .. 25
భాస్వానుదేతి వికచాని సరోరుహాణి
సంపూరయంతి నినదైః కకుభో విహంగాః .
శ్రీవైష్ణవాస్సతతమర్థితమంగలాస్తే
ధామాశ్రయంతి తవ వేంకట సుప్రభాతం .. 26
బ్రహ్మాదయస్సురవరాస్సమహర్షయస్తే
సంతస్సనందనముఖాస్త్వథ యోగివర్యాః . (ముఖాస్తవ)
ధామాంతికే తవ హి మంగలవస్తుహస్తాః
శ్రీవేంకటాచలపతే తవ సుప్రభాతం .. 27
లక్ష్మీనివాస నిరవద్యగుణైకసింధో
సంసారసాగరసముత్తరణైకసేతో .
వేదాంతవేద్య నిజవైభవ భక్తభోగ్య
శ్రీవేంకటాచలపతే తవ సుప్రభాతం .. 28
ఇత్థం వృషాచలపతేరిహ సుప్రభాతం
యే మానవాః ప్రతిదినం పఠితుం ప్రవృత్తాః .
తేషాం ప్రభాతసమయే స్మృతిరంగభాజాం
ప్రజ్ఞాం పరార్థసులభాం పరమాం ప్రసూతే .. 29
!! ఇతి వేంకటేశసుప్రభాతం !!
అథ వేంకటేశస్తోత్రం
కమలాకుచచూచుకకుంకుమతో
నియతారుణితాతులనీలతనో .
కమలాయతలోచన లోకపతే
విజయీ భవ వేంకటశైలపతే .. 1
సచతుర్ముఖషణ్ముఖపంచముఖ-
ప్రముఖాఖిలదైవతమౌలిమణే .
శరణాగతవత్సల సారనిధే
పరిపాలయ మాం వృషశైలపతే .. 2
అతివేలతయా తవ దుర్విషహైః
అనువేలకృతైరపరాధశతైః .
భరితం త్వరితం వృషశైలపతే
పరయా కృపయా పరిపాహి హరే .. 3
అధివేంకటశైలముదారమతే-
ర్జనతాభిమతాధికదానరతాత్ .
పరదేవతయా గదితాన్నిగమైః
కమలాదయితాన్న పరం కలయే .. 4
కలవేణురవావశగోపవధూ-
శతకోటివృతాత్స్మరకోటిసమాత్ .
ప్రతివల్లవికాభిమతాత్సుఖదాత్
వసుదేవసుతాన్న పరం కలయే .. 5
Read More Sri Venkateswara Suprabhatam
అభిరామగుణాకర దాశరథే
జగదేకధనుర్ధర ధీరమతే .
రఘునాయక రామ రమేశ విభో
వరదో భవ దేవ దయాజలధే .. 6
అవనీతనయాకమనీయకరం
రజనీకరచారుముఖాంబురుహం .
రజనీచరరాజతమోమిహిరం
మహనీయమహం రఘురామమయే .. 7
సుముఖం సుహృదం సులభం సుఖదం
స్వనుజం చ సుకాయమమోఘశరం .
అపహాయ రఘూద్వహమన్యమహం
న కథంచన కంచన జాతు భజే .. 8
వినా వేంకటేశం న నాథో న నాథః
సదా వేంకటేశం స్మరామి స్మరామి .
హరే వేంకటేశ ప్రసీద ప్రసీద
ప్రియం వేంకటేశ ప్రయచ్ఛ ప్రయచ్ఛ .. 9
అహం దూరతస్తే పదాంభోజయుగ్మ-
ప్రణామేచ్ఛయాఽఽగత్య సేవాం కరోమి .
సకృత్సేవయా నిత్యసేవాఫలం త్వం
ప్రయచ్ఛ ప్రయచ్ఛ ప్రభో వేంకటేశ .. 10
అజ్ఞానినా మయా దోషాన్ అశేషాన్విహితాన్ హరే .
క్షమస్వ త్వం క్షమస్వ త్వం శేషశైలశిఖామణే .. 11
!! ఇతి వేంకటేశస్తోత్రం !!
అథ వేంకటేశప్రపత్తి
ఈశానాం జగతోఽస్య వేంకటపతేర్విష్ణోః పరాం ప్రేయసీం
తద్వక్షస్స్థలనిత్యవాసరసికాం తత్క్షాంతిసంవర్ధినీం .
పద్మాలంకృతపాణిపల్లవయుగాం పద్మాసనస్థాం శ్రియం
వాత్సల్యాదిగుణోజ్జ్వలాం భగవతీం వందే జగన్మాతరం .. 1
శ్రీమన్ కృపాజలనిధే కృతసర్వలోక
సర్వజ్ఞ శక్త నతవత్సల సర్వశేషిన్ .
స్వామిన్ సుశీల సులభాశ్రితపారిజాత
శ్రీవేంకటేశచరణౌ శరణం ప్రపద్యే .. 2
ఆనూపురార్పితసుజాతసుగంధిపుష్ప-
సౌరభ్యసౌరభకరౌ సమసన్నివేశౌ .
సౌమ్యౌ సదాఽనుభవనేఽపి నవానుభావ్యౌ
శ్రీవేంకటేశచరణౌ శరణం ప్రపద్యే .. 3
సద్యోవికాసిసముదిత్వరసాంద్రరాగ-
సౌరభ్యనిర్భరసరోరుహసామ్యవార్తాం .
సమ్యక్షు సాహసపదేషు విలేఖయంతౌ
శ్రీవేంకటేశచరణౌ శరణం ప్రపద్యే .. 4
రేఖామయధ్వజసుధాకలశాతపత్ర
వజ్రాంకుశాంబురుహకల్పకశంఖచక్రైః .
భవ్యైరలంకృతతలౌ పరతత్త్వచిన్హైః
శ్రీవేంకటేశచరణౌ శరణం ప్రపద్యే .. 5
తామ్రోదరద్యుతిపరాజితపద్మరాగౌ
బాహ్యైర్మహోభిరభిభూతమహేంద్రనీలౌ .
ఉద్యన్నఖాంశుభిరుదస్తశశాంకభాసౌ
శ్రీవేంకటేశచరణౌ శరణం ప్రపద్యే .. 6
సప్రేమభీతి కమలాకరపల్లవాభ్యాం
సంవాహనేఽపి సపది క్లమమాదధానౌ .
కాంతావవాంగ్మనసగోచరసౌకుమార్యౌ
శ్రీవేంకటేశచరణౌ శరణం ప్రపద్యే .. 7
లక్ష్మీమహీతదనురూపనిజానుభావ-
నీలాదిదివ్యమహిషీకరపల్లవానాం .
ఆరుణ్యసంక్రమణతః కిల సాంద్రరాగౌ
శ్రీవేంకటేశచరణౌ శరణం ప్రపద్యే .. 8
నిత్యానమద్విధిశివాదికిరీటకోటి-
ప్రత్యుప్తదీప్తనవరత్నమహఃప్రరోహైః .
నీరాజనావిధిముదారముపాదధానౌ
శ్రీవేంకటేశచరణౌ శరణం ప్రపద్యే .. 9
విష్ణోః పదే పరమ ఇత్యుదితప్రశంసౌ
యౌ మధ్వ ఉత్స ఇతి భోగ్యతయాఽప్యుపాత్తౌ .
భూయస్తథేతి తవ పాణితలప్రదిష్టౌ
శ్రీవేంకటేశచరణౌ శరణం ప్రపద్యే .. 10
పార్థాయ తత్సదృశసారథినా త్వయైవ
యౌ దర్శితౌ స్వచరణౌ శరణం వ్రజేతి .
భూయోఽపి మహ్యమిహ తౌ కరదర్శితౌ తే
శ్రీవేంకటేశచరణౌ శరణం ప్రపద్యే .. 11
మన్మూర్ధ్ని కాలియఫణే వికటాటవీషు
శ్రీవేంకటాద్రిశిఖరే శిరసి శ్రుతీనాం .
చిత్తేఽప్యనన్యమనసాం సమమాహితౌ తే
శ్రీవేంకటేశచరణౌ శరణం ప్రపద్యే .. 12
అమ్లానహృష్యదవనీతలకీర్ణపుష్పౌ
శ్రీవేంకటాద్రిశిఖరాభరణాయమానౌ .
ఆనందితాఖిలమనోనయనౌ తవైతౌ
శ్రీవేంకటేశచరణౌ శరణం ప్రపద్యే .. 13
ప్రాయః ప్రపన్నజనతాప్రథమావగాహ్యౌ
మాతుస్స్తనావివ శిశోరమృతాయమానౌ .
ప్రాప్తౌ పరస్పరతులామతులాంతరౌ తే
శ్రీవేంకటేశచరణౌ శరణం ప్రపద్యే .. 14
సత్త్వోత్తరైస్సతతసేవ్యపదాంబుజేన
సంసారతారకదయార్ద్ర దృగంచలేన .
సౌమ్యోపయంతృమునినా మమ దర్శితౌ తే
శ్రీవేంకటేశచరణౌ శరణం ప్రపద్యే .. 15
శ్రీశ శ్రియా ఘటికయా త్వదుపాయభావే
ప్రాప్యే త్వయి స్వయముపేయతయా స్ఫురంత్యా .
నిత్యాశ్రితాయ నిరవద్యగుణాయ తుభ్యం
స్యాం కింకరో వృషగిరీశ న జాతు మహ్యం .. 16
!! ఇతి వేంకటేశప్రపత్తి !!
అథ వేంకటేశమంగలాశాసనం
శ్రియః కాంతాయ కల్యాణనిధయే నిధయేఽర్థినాం
శ్రీవేంకటనివాసాయ శ్రీనివాసాయ మంగలం .. 1
లక్ష్మీ సవిభ్రమాలోకసుభ్రూవిభ్రమచక్షుషే
చక్షుషే సర్వలోకానాం వేంకటేశాయ మంగలం .. 2
శ్రీవేంకటాద్రిశృంగాంగ్రమంగలాభరణాంఘ్రయే
మంగలానాం నివాసాయ శ్రీనివాసాయ మంగలం .. 3
సర్వావయవసౌందర్యసంపదా సర్వచేతసాం
సదా సమ్మోహనాయాస్తు వేంకటేశాయ మంగలం .. 4
నిత్యాయ నిరవద్యాయ సత్యానందచిదాత్మనే
సర్వాంతరాత్మనే శ్రీమద్వేంకటేశాయ మంగలం .. 5
స్వతస్సర్వవిదే సర్వశక్తయే సర్వశేషిణే
సులభాయ సుశీలాయ వేంకటేశాయ మంగలం .. 6
పరస్మై బ్రహ్మణే పూర్ణకామాయ పరమాత్మనే
ప్రయుంజే పరతత్త్వాయ వేంకటేశాయ మంగలం .. 7
ఆకాలతత్త్వమశ్రాంతం ఆత్మనామనుపశ్యతాం
అతృప్త్యమృతరూపాయ వేంకటేశాయ మంగలం .. 8
ప్రాయస్స్వచరణౌ పుంసాం శరణ్యత్వేన పాణినా
కృపయాఽఽదిశతే శ్రీమద్వేంకటేశాయ మంగలం .. 9
దయామృత తరంగిణ్యాస్తరంగైరివ శీతలైః
అపాంగైః సించతే విశ్వం వేంకటేశాయ మంగలం .. 10
స్రగ్భూషాంబరహేతీనాం సుషమావహమూర్తయే
సర్వార్తిశమనాయాస్తు వేంకటేశాయ మంగలం .. 11
శ్రీవైకుంఠవిరక్తాయ స్వామిపుష్కరిణీతటే
రమయా రమమాణాయ వేంకటేశాయ మంగలం .. 12
శ్రీమత్సుందరజామాతృమునిమానసవాసినే
సర్వలోకనివాసాయ శ్రీనివాసాయ మంగలం .. 13
మంగలాశాసనపరైర్మదాచార్య పురోగమైః
సర్వైశ్చ పూర్వైరాచార్యైః సత్కృతాయాస్తు మంగలం .. 14
!! ఇతి వేంకటేశ మంగలాశాసనం !!
…. 
….